په اسلامي فقه کې د بيمې او تکافل حکم

چکیده

په اسلامي فقه کې د بیمې (Insurance) او تکافل (Takaful) حکم د معاصر مالي معاملو له مهمو او بحث ‌انګیزو موضوعاتو څخه دی، بیمه یو اقتصادي تړون دی چې پکې یو شخص د احتمالي مالي زیان پر وړاندې ځان تضمینوي، خو دا معامله باید د اسلامي اصولو مطابق وي؛ تکافل بیا یو اسلامي بدیل دی چې د شراکت، همکارۍ او د زیان شریکولو پر اساس ولاړ دی. د دې څېړنې موخه داده چې د بیمې مختلف ډولونه وپیژندل شي (تجارتي، ټولنیزه، روغتیایي، وغیره). دا ارزول شي چې آیا دا ډول تړونونه د اسلامي فقه له نظره جایز دي که نه؟ او تکافل د یوه مشروع اسلامي بدیل په توګه معرفي شي. د بیمې تړونونه په معاصرو ټولنو کې ډېر مهم رول لري، نو دا معلومول ډېر اړین دي چې د اسلام له نظره څه حیثیت لري، مسلمانان غواړي د مالي خوندیتوب لپاره داسې لارې غوره  کړي چې د شریعت مطابق وي او د اسلامي مالي سیسټم پراختیا سبب وګرځي. نوموړې موضوع يوه کتابتوني موضوع ده، د موضوع د ثبوت لپاره د قرآن الکريم آیتونه او د نبي کريم صلی‌الله علیه وسلم احادیث ذکر شوي دي، د آیتونو ژباړه او  د فقهي کتابو حوالې د معتمدو فقهي مراجعو څخه راخیستل شوي دي. بیمه د ډېرو فقهاؤ د سود، غرر او قمار له امله ناروا ګڼي، تکافل د اسلامي اصولو پر بنسټ یو مشروع بدیل ګڼل کېږي، د معاصرو فقهی شوراګانو لکه د اسلامي فقهې اکادیمي او د اسلامي بانکدارۍ ادارو لخوا تکافل تائید شوی؛ مسلمان بانکونه او مالي ادارې کولی شي د تکافل سیسټم له لارې خدمات وړاندې کړي.